newsdog Facebook

IL&FSના કન્સલ્ટન્ટ્સને SFIOની નોટિસ: 10 વર્ષની વિગત માંગી

I Am Gujarat 2019-10-09 15:30:04

71503118

સુગાતા ઘોષ/રશ્મિ રાજપૂત

મુંબઈ:સિરિયસ ફ્રોડ ઇન્વેસ્ટિગેશન ઓફિસ (SFIO)એ ભારતની ટોચની કાનૂની પેઢીઓ અને કન્સલ્ટન્ટ્સને તેમની પાસે રહેલી IL&FSને લગતી તમામ માહિતી જાહેર કરવા આદેશ કર્યો છે. એક વર્ષ અગાઉ IL&FSનું પતન થયું હતું.

કોર્પોરેટ બાબતોના મંત્રાલય હેઠળ આવતી આ સેન્ટ્રલ એજન્સીએ પાછલાં દસ વર્ષની માહિતીની માંગણી કરી છે જેમાં આ કંપનીઓએ IL&FS અથવા તેની પેટાકંપનીઓ અથવા જૂથ કંપનીઓનું પ્રતિનિધિત્વ કર્યું હોય અથવા તેને સલાહ આપી હોય.SFIOની નોટિસ કંપની કાયદાના વિવિધ કલમો હેઠળ આપવામાં આવી છે જે દસ દિવસ અગાઉ મળી હતી તેમ સૂત્રોએ ઇટીને જણાવ્યું હતું.

SFIO દ્વારા માંગવામાં આવેલી માહિતીમાં અન્ય બાબતો ઉપરાંત તેમના દ્વારા આપવામાં આવેલી સલાહના પ્રકાર તથા તેના માટે ચાર્જ કરવામાં આવેલી ફીનો પણ સમાવેશ થાય છે.

તેમાંની કેટલીક કાયદા પેઢીઓએ તેમના ભૂતપૂર્વ ક્લાયન્ટ આઇએલ એન્ડ એફએસનો તેની સહમતી મેળવવા સંપર્ક કર્યો છે. એટર્ની અને ક્લાયન્ટ વચ્ચેના પત્ર વ્યવહાર, વાતચીત ઇન્ડિયન એવિડન્સ એક્ટ, 1972 અને બાર કાઉન્સિલ ઓફ ઇન્ડિયા રુલ્સ જેવા વિવિધ કાયદા હેઠળ ગુપ્ત રહેવા બંધાયેલા છે.

દેશની સૌથી મોટી કાયદા પેઢીમાંની એક પેઢીના એક ભાગીદારે જણાવ્યું હતું કે, “લો એન્ફોર્સમેન્ટ અથવા કાયદા હેઠળની એજન્સીઓ દ્વારા તપાસ હેઠળ માહિતી મેળવવા માટે કાયદા પેઢીઓનો સંપર્ક ભાગ્યે જ કરવામાં આવતો હોય છે, આ પ્રવાહ નવો છે. અમે સહકાર આપીશું પરંતુ કાયદા હેઠળ અમારા હાથ બંધાયેલા હોવાના કારણે અમે IL&FSનો સંપર્ક કર્યો હતો.”

એમ્પ્લોયમેન્ટ બંધ થાય તે પછી પણ એટર્ની ક્લાયન્ટના વિશેષાધિકાર જળવાઈ રહે છે. જોકે, ગ્રાહક તેની સહમતી વ્યક્ત કરે તે પછી માહિતી જાહેર કરવામાં આવે તો આવા વિશેષાધિકાર રહેતા નથી.

SFIO તરફથી સમાન પ્રકારના પત્ર એકાઉન્ટન્ટ્સ તથા કન્સલ્ટન્ટ્સને પણ મોકલવામાં આવ્યા છે કે જેમાં ટર્નઅરાઉન્ડ મેનેજમેન્ટ સોલ્યુશન ઓફર કરતી એક બહુરાષ્ટ્રીય કંપનીની પેટાકંપનીનો પણ સમાવેશ થાય છે.

એવી પૂરી સંભાવના છે કે SFIO કદાચ અગાઉના IL&FS બોર્ડ દ્વારા રોકવામાં આવેલી કન્સલ્ટન્ટ્સ તથા કાયદા કંપનીઓ દ્વારા ભજવવામાં આવેલી ભૂમિકા પર પણ
ધ્યાન કેન્દ્રિત કરશે. એજન્સી કદાચ તપાસ કરી શકે કે તેમાં કોઈ ખામી હતી કે કેમ. અથવા ગેરરીતિને લગતો પ્રશ્ન હતો કે નહીં તે જોવામાં આવશે. સૂત્રોના જણાવ્યા અનુસાર આ નોટિસો કંપની એક્ટની કલમ 217(1) હેઠળ આપવામાં આવી હતી જે તપાસકર્તા અધિકારીને કંપનીના અધિકારીઓ અને અન્ય કર્મચારીઓ અને એજન્ટ્સ કે જેમાં ભૂતપૂર્વ અધિકારીઓ, કર્મચારીઓ અને એજન્ટ્સનો સમાવેશ થાય છે તેમની પાસેથી માહિતી મેળવવાનો અધિકાર આપે છે.

સરકારી એજન્સીઓ તરફથી માહિતી માંગવામાં આવે ત્યારે ઘણીવાર વ્યાવસાયિકો, ઓડિટર્સ અને કન્સલ્ટન્ટ્સની હાલત સૂડી વચ્ચે સોપારી જેવી થાય છે. તેઓ માહિતી આપે તો ક્લાયન્ટના વિશ્વાસનો ભંગ થાય છે જ્યારે માહિતી ન આપવામાં આવે તો તપાસમાં સહકાર નહીં આપવાનો આરોપ લાગી શકે.